Porta inant ti cunescënzes y cumpetënzes digiteles
L cunzet de na tlass digitela ie unì laurà ora tl ann de scola 2017/2018 y l ti ie unì pità per l prim iede l ann do ai studënc dla sezion aministrazion, finanzes y marketing. Te chësta tlass vën i media digitei y l internet adurvei per nsenië y per mparé ntan la lezions per les fé deventé plu efizientes. A chësta moda dëssa l nteres di studënc se auzé y l'adurvanza de programs, sciche OneNote, dëssa purté pro a na miëura ndividualisazion tl nseniamënt. Lauré cun media digitei porta pro a lauré deberieda y stimulea a cunlauré a na maniera cooperativa. Oradechël ti juda chësc ai studënc a svilupé cumpetënzes de planificazion y urganisazion.
L mond de aldidancuei se damanda for plu y plu cumpetënzes tl ciamp digitel y nce perchël possen udëi la tlass digitela coche na njinieda al mond dl lëur, ma nce a chël privat.
I obietifs dla tlass digitela ie:
- Aumënt dla motivazion per mparé y dla cumpetënzes per mparé y planifiché
- N nseniamënt che raida mo deplù ntëur ai studënc
- Na miëura desferenziazion
- N miuramënt dla cumpetënzes tl ciamp di media
- N miuramënt dla cumpetënzes sozieles y de comunicazion
- Aumënt dl'atratività dla scola
- L'adurvanza de tecnologies modernes tla didatica
- Aumënt dla cumpetënzes digiteles di studënc
- Na majera respunsabltà per i studënc che muessa cialé de si laptop
Nes basan sun l cunzet BYOD ("Bring your own device"/"Porta ti aparat") ons prià bel la families de ti cumpré n laptop a si mut/a.
L esperienza mostra che tres chësc model, iel da udëi n aumënt dla respunsabltà di studënc y nce che tres l cunzet BYOD iel plu saurì da manejé tecnicamënter.
Oradechël vën nce renfurzedes la cumpetënzes digiteles tl'autra sezions ti dajan nscila nce a chisc studënc n'educazion mediela ntan la lezions.
