Storia dl ITE Raetia

Do la segonda gran viera dl ultim centené fova la situazion dla sco-les te nosta provinzia te na stleta situazion. Do che n ova mudà plù suënz l sistem de scola (dal 1916 scola me per tudësch, dal 1921 scola me per talian, dal 1943 scola me per tudësch) ne fovel net nia saurì abiné zeche che ti scusëssa a duc. Dl 1948 vën publicà l De-cret dl minister Guido Gonella (n. 5145/76 dl 27 de agost 1948) sun la istituzion dla scola paritetica di luesc ladins. I prim ani do la viera rujenoven me dla scola elemente-ra che jiva dala prima ala otava! Bele dal 1951 inant iel a Urtijëi na scola mesana, 11 ani dan che la ie unida metuda su de ublianza per duc cun na lege a livel statel. Dl 1954 vëniel giaurì a Urtijëi n Istitut per Ragionieri sciche sezion destacheda dl ITC de Bulsan. Da ann a ann messova l ministero de Roma dé la autorisazion de pudëi jì inant sciche sezion destacheda l ITC de Bulsan. Cun decret dl Presidënt dla Republica dl 21 de lugio 1959, n. 1441, ie pona l ITC “Raetia” deventà n Istitut autonom, ne dependan nia plu da n Istitut de Bulsan. L ann de scola 1959/1960 ie perchël stat l prim ann de scola cun funzionamënt autonom.

La sëntes dl ITC Raetia

Dl 1954 ne fovel sambënzënza mo degun fabricat per chësta sezion nueva destacheda dla scola de Bulsan. Chësta prima tlas nueva cun 9 studënc scric ite ova giapà si lerch deberieda cun i sculeies dla Scola Mesana tla cësa “Bet” tla streda Sotria. Chësta situazion à durà 9 ani. L ann 1963 ie unida zareda ju la cësa dl “Bet” per pudëi ti pité la lerch a na costruzion nueva y moderna per la Scola Mesana. L Istitut Tecnich per l Cumerz “Raetia”, che ntant fova dassën chersciù y ova cin tlasses cun ndut 64 studënc, ova messé trapiné tl ex Hotel “Miramonti” (“Salman”) via n Sureghes. Te chësc fabricat che fova unì cumprà dala Provinzia, ie l Istitut “Raetia” restà nchin l ann de scola 1968/1969. (Aldidancuei ie te chësta luegia la scolina de Sureghes.) Davia che chësta si-tuazion ne fova nia adateda per na scola àn messé pensé a zeche de adatà. Do avëi abinà la mieura soluzion per ntlëuta à la aministrazion provinziela deberieda cun la aministrazion chemunela de Urtijëi cumprà n vedl fabricat danter la Scola d’Ert y la Scola Mesana y lascià fé su l’ann 1968 na costruzin nueva do dessënies dl arch. Georg Schmalzl. Tl ann 1969 àn pona pudù scumence tla sënta nueva tla streda Rezia. Davia che l fabricat fova unì fat per cin tlasses y la iscrizions jiva su da ann a ann fova nce chësta sënta tosc massa pitla. A pie via dal ann 1985 nchin al ann 1992 messova vel tlas uní metuda tla senta dla scola elementera sun plaza de dlieja davia che l fova plu tlasses y nia dutes ova lerch tla scola tla streda Rezia. Giut ala longia iel pona iuní studià y pustejà cie fe: na scola nueva n zaul d’auter, magari ti plans dla Cademia, na costruzion nueva al post dla vedla, n edifize nuef per la doi scoles d’Ert y l ITC y n.i.

Ala fin dla finedes (ntant fova la scola d’ert unida fata su da nuef) àn teut la dezijion de zaré ju la scola fata su l ann 1968 y de n fé na nueva tl medemo post.De mei 2006 à l “assessorat ai lëures publics, scola y cultura ladina” cun a cë l assessëur Dr. Florian Mussner, scrit ora i lëures. Do mpue passa doi ani iesen stac boni de finé chësc gran lëur de 27.100 m³ cun ona spersa de 7.400 m². Dut adum ie chisc lëures unic a custé 15,3 milions de euro.De d’autonn dl 2008 fovela pona tan inant che n à pudù zapé ite tla scola nueva. Danter i ani 1984 y 1992 fovel for danter 160 y 190 sculeies scric ite, ruvan su per trei ani alalongia a 10 tlasses. Pona à l numer de iscrizions scumencià a calé nchin al ann 2003. N se à fat truep pensieres ciche n pudëssa fé y dal ann 2001 an pona pità dlongia la tlasica sezion de ragioneria, che ntant fova deventeda IGEA, na segonda direzion: la sezion turistica y rujenedes, cun la cuinta rujeneda, l spanuel. Chësta dezijion ie unida tëuta su de bon uedl dala populazion y l numer di scric ite jiva inò suvier.

La sezion sportiva

À pie via dal ann de scola 2007/2008 ie pona ruveda leprò na terza direzion de nosc istitut tecnich, la sezion sportiva. N possa bën di che chësc ie stat n gran suzes y l numer di scric ite ie ntant ruvà su a 220. L ne n ie nia stat saurì a mëter a ji chësta sezion y me cun l unì ncontra da pert di nsenianc y de gra al aiut dl Schi Club Gherdëina cun si presidënta da sën Lidia Bernardi, che ie nce nosta nsenianta y coordinatëura de chësta sezion, possen garantì n lëur de aut livel sibe te scola che nce tl sport. Sce i prims ani iel stat mesum mëter a ji la sezion sportiva me per via dl’autonomia scolastica, pona iël da chësc ann de scola inant, de gra ala deliberazion dla Jonta Provinziela di 23 de setëmber 2014, n. 1118, na sezion ufiziela, recunesciuda nce dala provinzia. Chësta deliberazion scrisc nce dant avisa ciun che ie l cuntribut finanzier che ti spieta a chësta sezion.