Scola y Sport
Cun l pruiet “Scola y Sport” à i sculeies y la sculées scric/tes ite tla sezions Marketing y Turism l mesun de tenì ite na cuntinuità tl sport tres la cunlaurazion cun n valguna lies dal sport de Gherdëina, coche l FC Gherdëina, l HC Gherdëina, l Tennis Club Gherdëina, l Tennis Club Urtijëi, l Iceclub Gherdëina, Atletica Gherdëina, la Lia de jì a ciaval de Pozamanigoni y Nuoto Gardena.
Tl zënter de chësta scumenciadiva iel la ulentà de mëter su n cuntest educatif che posse valurisé l aspet dal sport da una na pert, garantian alenamënc de livel aut, che l aspet de scola dal’autra pert, tres na furmazion de gran cualità te n sistem paritetich che tën cont y valurisea la trëi rujenedes dla provinzia de Bulsan. Ala sculées y ai sculeies ti vëniel dat duc i mesuns aldò per vester pona boni de mustré si putenzialiteies te duc i ciamps, l miec che la va.
Our partners
Per chiche l pruiet ie pensà
L pruiet “Scola y Sport” ie pensà dantalut per i jëuni y la jëunes che ie scric ite te na lia dal sport che fej pea pra la scumenciadiva y che uel fé la sezion Marketing o la sezion Turism tl ITE Raetia. Sambën che l ie nce bënunides y bënunic la sculées y i sculeies di chemuns ntëurvia. Ulon sotrissé che duc i jëuni y duta la jëunes possa jì a scola da nëus nce zënza fé pea pra chë pruiet, chiran ora danter una dla sezions de Marketing, Turism o Sport.
Tan giut dura pa l pruiet?
Na cossa de gran mpurtanza iel per nëus che l vënie garantì ne cuntinuità, jan inant cun l pruiet per dui cinch i ani de scola auta da nëus tl ITE. Ti ani da unì possa nscila duc i sculeies y duta la sculées che se scrij ite te na sezion de Marketing o Turism fé pea pra l pruiet “Scola y Sport”.
Coche l va
I jëuni y la jëunes à l mesun de fé alenamënt uni lunesc y mierculdi, dala 10.10 nchin la 12.45, cun alenamënc spezifics tla lies dal sport cris ora. Do la prima trëi ëura de scola vëniel nscila jit a fé alenamënt per unì inò de reviers per la lezions che ie domesdì, cun n orar che ie mpue’ desferenzià. Ntan l ann uniràl oradechël fat plu workhsop, sentedes de alenamënt funziunel y ancuntedes cun esperc, cun la finamira de svilupé tla jëunes y ti jëuni na cultura dal sport che vede sëura la prestazion ora, fajan prumuzion de viers dla metodologies de training, dl maië y bever, de co fé a recuperé o trajan nce ite tematiches de mental coaching. N valgun dis uniràl fat “screening y testing” per valuté tresora coche la jëunes y i jeuni crësc y se svilupea, ti dajan nscila nfurmazions de utl ala lies n con’ di atlec y dla atletes, a na moda che i alenamënc posse unì persunalisei tla miëura maniera. Chësta atività ie fundamentela nce per la jëunes y i jëuni nstësc, ajache la lascia pro de giaté n feedback mpurtant n con’ de si ponc de forza y n con’ de ulà y sun cie che l ie debujën de lauré mo deplù.
TSOMM
L acronim TSOMM uel dì “tlo sons mutivà a mparé“.
Coche scola ulons svilupé nosc cunzet pedagogich dal ann 2024/25 y l slargé ora ti judan ala sculées y ai sculeies a mparé te na maneira cuoperativa y davierta. L nseniamënt tlassich se gëura y i sculeies/la sculées arjonj cumpetënzes mpurtantes se dajan ju cun “pachetli de lëur”. Chëstes ie la cumpetëzes che unirà sustenides: l manejamënt dl tëmp, l lëur tl team, la comunicazion, la reflescion, la capazità critica y la criatività.
Tla cater ëura de TSOMM al’ena (lunesc y mierculdi, for la 5a y 6a ëura, o lunesc y mierculdi la 10a ëura per i sculeies/la sculées “scola y sport”) mpera i sculeies/la sculées a mparé te na maniera respunsabla y autonoma. L cunzet à si fundamënta sun trëi seves:
- Lidëza: i sculeies/la sculées possa tò la dezijion ulà (luegia de lëur), cun chi (partner) y canche i fej l’ativiteies ududes dant tl “pachetl de lëur”.
- Cuoperazion: i sculeies/la sculées mpera se giamian ora cun si cumpanies, for se tenian ala regules fates ora, y possa se nuzé di nsenianc/dla nseniantes coche ressursa. Tres la cuoperazion possi se dé ju cun “pachetli de lëur”, y dà pona ju prudoc finei. Lauran nscila vëniel renfurzà la capaziteies de abiné soluzions ai problems y de lauré tl team.
- Respunsabltà: i sculeies/la sculées à la respunsabltà de lauré ora si pachetli de lëur y de i dé ju per tëmp y ëura.
Nscila laurons nëus:
1a tlas y2a tlas:
Tla prima y segonda tlas scumencions cun “pachetli de lëur” de doi enes, che ie cuoperatifs y davierc. Chisc va i sculeies y la sculées a se tò y i lëura ora tl tëmp de doi enes. I sculeies y la sculées se chier ora cun chi y ulà che i lëura y possa jì damprovia cun i eserzizies, coche i uel. Dal segondo semester inant iel nce cater enes de materia. Ntan chësta enes vëniel laurà te na maneira ntensciva mé te una dla cater materies, lauran ora per ejëmpl podcast, videos, ntervistes o poetry slam.
